ئەڤ ڤەکۆلینا نوکە ئارمانجا وێ ناسینا ئاستێ ئارامیا دەرونی (الأمن النفسي) یە ل دەف قوتابیێن پشکێ کۆمەلناسیێ ل کۆلیژا زانستێن مرۆڤایەتی ل زانکۆیا دهۆکێ، هەروەسا ئاشکراکرنا ئاستێ هندەک ئاراستەیێن دەمارگیریێ (الاتجاهات التعصبية) ل دەف وان، زێدەباری ڤەکۆلینێ ل سەر سروشتێ پەیوەندیا د ناڤبەرا ئارامیا دەرونی و ئاراستەیێن دەمارگیریێ دا.
ڤەکۆلینێ پشت ب میتۆدێ وەسفی یێ پەیوەندیدار (المنهج الوصفي الارتباطي) بەستایە، و کۆما نموونەیا ڤەکۆلینێ ژ ژمارەکا قوتابیێن پشکێ کۆمەلناسیێ پێکدهات کو ب رێکارەکێ گونجای هاتبوونە هەلبژارتن. بۆ کۆمکرنا داتایان، پێوەریێ ئارامیا دەرونی و پێوەریێ ئاراستەیێن دەمارگیریێ هاتنە بکارهینان پشتی کو پشتراستبوون ژ راستی و جێگیریا وان هاتیە کرن.
ئەنجامێن ڤەکۆلینێ دیارکر کو ئاستێ ئارامیا دەرونی ل دەف قوتابیان یێ بلند بوو، ل هەمبەر دا ئاستێ ئاراستەیێن دەمارگیریێ یێ نزم بوو. هەروەسا ئەنجامان نیشان دا کو پەیوەندیەکا پێچەوانە (علاقة عكسية) یا خودان واتایا ئاماری د ناڤبەرا ئارامیا دەرونی و ئاراستەیێن دەمارگیریێ دا هەیە؛ ب ڤی رەنگی کو هەرچەندە ئاستێ ئارامیا دەرونی ل دەف قوتابیان بلندتر لێ بهێت، ئاراستەیێن دەمارگیریێ ل دەف وان کێمتر دبن.
ل دویڤ ئەنجامان، ڤەکۆلینێ پێشنیار کر کو پێدڤیە پاراستن ل سەر ئاستێ بلند یێ ئارامیا دەرونی ل دەف قوتابیان بهێتە کرن و بهێتە ب هێزکرن ب رێکا بەرنامەیێن رێنمایی و پەروەردەیی، هەروەسا بەردەوامی بهێتە دان ب پشتەڤانیکردنا چالاکییێن زانکۆیێ یێن کو بەهایێن تەبا بوونێ (التسامح)، پێکڤەژیانێ و قبوولکرنا یێ دی (قبوول الآخر) ب هێز دکەن