ڕه‌گه‌زدۆزی ( هه‌ڤره‌گه‌ز ) (الجناس)
ڕه‌گه‌زدۆزی :
ئه‌وه‌ كو دوو په‌یڤ یان پتر د ڕوخساریدا وه‌كو ئێك بن یان نزیكی ئێك بن ، لێ ڕامانا وان یا جودابیت .
-بۆ نموونە:
ئه‌گه‌ر خاله‌ت بڵێم میشكی خه‌تایه‌
عه‌زیزی من ئه‌مه‌م عه‌ینی خه‌تایه‌
) حاجی)
دڤێ دێڕا هۆزانێ دا بابه‌تێ (ڕه‌گه‌زدۆزی) هه‌یه‌ ، چونكی دوو جارا په‌یڤا (خه‌تا) هاته‌ییه‌ كو د ڕوخساریدا وه‌كی ئێكن لێ ڕامانا وان جودایه‌ . (خەتا: جھەکە ل تورکستانا چینی) - (خەتا: گونەھـ)
به‌ ئاهـ و گریان دیسان هاته‌وه‌ هه‌وری نیسان
جگه‌ر پڕ ئاو و ئاور وه‌ك عاشقی بێ قه‌رار
)وەفایی)
دڤێ دێڕا هۆزانێ دا بابه‌تێ (ڕه‌گه‌زدۆزی) هه‌یه‌ ، چونكی په‌یڤێن (ئاو – ئاور) ، (دیسان – نیسان) وه‌كی ئێك نینه‌ به‌لێ نزیكی ئێكن .
ڕەگەزدۆزی دبیتە دوو جۆر :
١. رەگەزدۆزیا تەمام :
ئەوە کو پەیڤێن وی د روخساریدا وەکی ئێکن، ئانکو د (ھژمارا پیتان / جۆری پیتان / ڕێزا پیتان) دا وەکی ئێکن ، بەلێ رامان جودابیت.
ئەوەی ڕێگای لە کوردەکان گۆڕی
لەعنەتی خوا لە لەحەد و گۆڕی (مەلای گەورە)
دڤی دێرا ھۆزانێ دا بابەتی (رەگەزدۆزیا تەمام) ھەیە، چونکی دوو جارا پەیڤا (گۆڕی) ھاتییە کو د روخساریدا وەکی ئێکن لێ رامانا وان جودایە . (گۆڕی : گوھۆڕین) - (گۆڕی: قەبر)

٢. ڕەگەزدۆزیا نەتەمام :
ئەوە کو پەیڤێن وی د ڕوخساری دا وەکی ئێک نینە ، ئانکو جوداھی د (ھژمارا پیتان، جۆری پیتان، ڕێزا پیتان) دا ھەیە .
- ھژمارا پیتان : ئانکو پەیڤەکێ پیتەکا زێدەتر ھەبیت ل پەیڤا دیکە ، و ئەڤ زێدەھی ژی ڕەنگە ل دەسپێکێ یان نافەڕاست یان دوماھییا پەیڤێ بیت .
مەعشووق تویی ب فەخر و نازی
عاشق تویی لێک بێ نیازی (خانی)
دڤی دێرا ھۆزانێ دا بابەتی (رەگەزدۆزیا نەتەمام) د ھەردوو پەیڤێن (ناز - نیاز) داھەیە ، چونکی ھژمارا پیتان جودایە . (٤ / ٣)
- جۆری پیتان : ئانکو ھژمارا پیتان ھندی ئێک بیت ، لێ پیتەکا جودا ھەبیت ، و ئەڤ جوداھیە ڕەنگە ل دەسپێکێ یان نافەڕاست یان دوماھییا پەیڤێ بیت .
پیری ب تەنیا ڕەحمەتە
پیری و ھەژاری زەحمەتە (حەمدی)
دڤی دێرا ھۆزانێ دا بابەتی (رەگەزدۆزیا نەتەمام) د ھەردوو پەیڤێن (ڕەحمەت - زەحمەت) داھەیە ، چونکی جۆری پیتان جودایە . (ڕ / ز)
- ڕێزا پیتان : ئانکو دوو پەیڤ د ھژمار و جۆری پیتان دا وەکی ئێک بن ، بەلێ زنجیرە و ڕێزبەندیا وان جودا بیت .
خاترێکی شۆخ و خۆش و بێ غەم و جەمعم هەبوو
ئێستە بۆ زوڵفی کەسێ مەشقی پەرێشانی دەکا(نالی)
دڤی دێرا ھۆزانێ دا بابەتی (رەگەزدۆزیا نەتەمام) د ھەردوو پەیڤێن (شۆخ - خۆش) داھەیە ، چونکی ڕێزبەندیا پیتان جودایە . (ش . و . خ) - (خ . و . ش)