کـورد د "خۆتبا بەیانێ" دا
يا دهێتە پاڵدان بۆ خەلیفە (ئیمام) عەلی یێ کورێ ئەبو تالبی
خۆتبا بەیانێ ئێکە ژ وان خۆتبێن ناڤدار ل دەڤ شیعەیان، کو بەحسێ زانستێ غەیبێ، پێشبینییان، دوماهیا زەمانی و دەرکەفتنا ئیمامێ مەهدی دکەت. تێدا هاتیە ڤەگوهاستن کو پێغەمبەری (سڵاڤ لێ بن) هندەک پێزانین گۆتینە کو دهێتە ئیدیعاکرن نھێنی بوون د ناڤبەرا وی و خودێ دا. لێ ژێدەرێن دەسپێکێ یێن شیعەیان بەحسێ ڤێ خۆتبێ ناکەن، بەلکو ژێدەرێن پاشتر بەحس کرینە، وەک پەرتوکا (إلزام الناصب في إثبات الحجة الغائب) یا عەلی بن یەزید ئەلحائیری. د ڤێ خۆتبێ دا گەلەک بەحسێ کوردان هاتیە کرن و دشێین د چەند خالان دا کورت بکەین:
پەیوەندییا کوردان دگەل بەنی ئومەیان: ناڤێ کوردان هاتیە گرێدان ب هەڤکاریکرنێ دگەل ئەمەوییان (سوفیانییان) د کارێن وێرانکاری، خرابکاری، بێحورمەتی ب نامیسێ، سەرژێکرنا زارۆکان، گرتنا ژنان و کوشتنا پیاوان دا.
دوعایێن ئیمام عەلی: هاتیە ڤەگوهاستن کو ئیمام عەلی چەندین جاران دوعایێن شەڕی ل کوردانکرینە.
تۆمەتبارکرنا کوردان: کورد هاتینە تۆمەتبارکرن ب کوشتنا زارۆکێن ئەهلێ بەیتێ.
تێبینییەكا گرنگ: هژمارەکا زۆرا زانایێن ئیسلامێ و مێژووناسان (ژ هەر دوو مەزهەبان) گۆمانێن مەزن د ئێخنە سەر ڕاستیا ڤێ خۆتبێ و دبێژن کو یا دروستکرییە و چ بنەما بۆ نینن، و یا پرە ژ زێدەگاڤی و تشتێن کو دگەل باوەر و ڕەوشتێ ئیمام عەلی ناگونجن.