ڤەکولینا کاریگەریا پێشبینییێن کەش وهەوایی ل سەر ژیانا سیاسی و لەشکەری د ناڤ چوارچێوەی شارستانیا ئیسلامی دا ل سەردەمێ عەبباسیان، بە تایبەتی ل وەڵاتێن ڕۆژهەلاتا جیهانا ئیسلامی، ژ بابەتێن مێژوویی یێن گرنگ دهێتە هژمارتن. ئەڤ ڤەکولینە سروشتێ بیر و تێگەهشتنێن دیار ل وی سەردەمی بەرامبەر دیاردەیێن کەش وهەوایی و لڤینا بەدەنێن ئەستێران، هەروەسا کاریگەریا وان ل سەر چالاکییێن سیاسی و لەشکەری یێن مرۆڤی و شێوازێ بیرکرنا چینا سیاسی و سەربازی ل ڕۆژهەلاتا جیهانا ئیسلامی بەرچاڤ دکەت. هەروەها ڤەکولین ڕادێ پێشکەفتنا هزرا جوگرافی، و کاریگەریا وێ ل سەر مرۆڤی د وی سەردەمی دا دیار دکەت.
سەرکەفتنا چالاکییێن سیاسی و لەشکەری تا ڕادەیەکا مەزن گرێدایی شیانێن گونجان و خۆگونجاندنێ یە دگەل مەرجێن کەشوهەوایی یێن هەیی ل ناوچەیێن چالاکیان بوو. کەشوهەوا هوکارەکێ گرنگ بوو ل ئاراستەکرنا چالاکییێن مرۆڤی د چوارچێوەی دەم و جهی دا. هەروەسا سەرکەفتنا گەلەک هێرش و چالاکیێن لەشکەری گرێدایی زانینا فەرماندە و سەربازان ب بارودوخێن کەشوهەوایی، و پشتبەستنێ ب ئەستێرناس و مونەجیمان بوو د چاڤدێریکرنا گۆڕانکارییێن کەش وهەوایی و پێشبینیکرنا وان دا. ئەڤ کاریگەریە ل جیهانا ئیسلامی بەردەوام بوو، ب تایبەتی ل وەڵاتێن ڕۆژهەلاتا جیهانا ئیسلامی، هەرچەندە ل دویڤ پلەیێن جیاواز و سروشتێ روویدانان و بارودوخێ دەوروبەران بوو.
لەگەل هەبوونا پێشبینییێن ستێرناسیێ و کەشوهەوایی ل هندەک بویەرێن سیاسی و سەربازی، لێ ئەو نەبوونە هۆکارێ سەرەکی بۆ ئێکلاکرنا ململانێن سیاسی یان سەرکەفتنا چالاکیێن لەشکەری. بەلکو کاریگەریا وان ب شێوەیەکی سەرەکی د لایەنێ دەروونی دا دیار بوو، د بەرزکرنا ورەیا فەرماندە و سەربازان و ب هێزکرنا خوەڕاگریا وان ل مەیدانێن شەڕی و چالاکیێن لەشکەری دا.