بەیانا ١١ی ئادارا ١٩٧٠ێ ب ئێک ژ گرنگترین ڕێکەفتنان د دیرۆکا نوو یا کوردستانێ دا دهێتە هەژمارتن، ژ بەر کو پشتی چەندین سالێن جەنگێ د ناڤبەرا کوردان و حکومەتا عیراقێ دا هات، ئەو جەنگێ ل سالا ١٩٦١ێ دەستپێکری و ب شۆڕەشا ئەیلوولێ دهێتە ناسین. ب تایبەتی ژی پشتی وان ڕوودانێن ل سالا ١٩٦٩ێ قەومین و سەرکەفتنا پێشمەرگەی د وان شەڕان دا، ئەڤە بوو ئەگەر کو حکومەتا عیراقێ پێداچوونێ د سیاسەتێن خۆ دا بکەت، و چ ڕێکێن دی ل پێش خۆ نەدیتن ژ بلی دەستپێکرنا دانوستاندنێ دگەل سەرکردایەتییا شۆڕەشێ. ل دوماهییا کاروانێ دانوستاندنێ، گەهشتنە ڕێکەفتنا ١١ی ئادارا ١٩٧٠ێ، ئەوا دەستکەفتێن مەزن بۆ کوردان ب دەست ڤە ئیناین. ژ گرنگترین وان دەستکەفتان ژی، و بۆ ئێکەم جار د دیرۆکا کوردستانێ دا، مافێ حوکمێ زاتی (ئۆتۆنۆمی) ب کوردان هاتە دان.