هه‌لكه‌فتا رۆژا جیهانی یا (GIS) ل پشكا جوگرافیا/ كوليژا زانستێن مرۆڤایه‌تی
رۆژا جیهانی یا سستەمێن زانیاریێن جوگرافی (GIS Day) هه‌لكه‌فته‌كا سالانه‌یا نێڤده‌وله‌تی یه‌ كو بۆ پیرۆزكرنا رۆلێ ته‌كنۆلۆجیا جهی د تێگه‌هشتن و شروڤه‌كرنا دیاردێن جۆراوجۆر یێن جیهانێ دا تێته‌ گێڕان. ئارمانجا ڤێ رۆژێ به‌لاڤكرنا هشیاریێ یه‌ ده‌ربارێ گرنگیا سسته‌مێن زانیاریێن جوگرافی دا ل پشته‌ڤانیکرنا بڕیاردانێ، و دیاركرنا رۆلێ وێ یێ زێده‌بوویی د بوارێن پلاندانانا باژێری، رێڤه‌برنا سه‌رچاوه‌یێن سروشتی، چاڤدێریا ژینگەهێ، ئاسایش، ڤه‌گوهاستن، ساخله‌میێ و چه‌ندین بوارێن دی. هه‌روه‌سا، ئه‌ڤ رۆژه‌ ده‌لیڤه‌یه‌كه‌ بۆ ڤه‌كۆلەر، قوتابی و داموده‌زگه‌هان بۆ نیشادانا پرۆژێن وان یێن جوگرافی، و پێناساندنا وێره‌سێن (تطبیقات) نوو یێن (GIS) كو بووینه‌ ستوونه‌كێ سه‌ره‌كی د گوهۆرینا دیجیتالی دا و د ئاڤاكرنا باژێرێن زیره‌ك و رێڤه‌برنه‌كا به‌رده‌وام بۆ سه‌رچاوه‌یان.
په‌سه‌ندكرنا ڤێ رۆژێ دوپاتكرنه‌ ل سه‌ر رۆلێ (GIS) یێ مه‌زن ل ده‌مێ داتایێن مه‌زن و زیره‌كیا ده‌ستكرد، چنكو نه‌خشه‌ و شروڤه‌كرنێن جهی (المکانی) بووینه‌ پارچه‌یه‌كا جودانه‌كری ژ ژیانا مه‌ یا رۆژانه‌ و ژ ئامرازێن ڤه‌كۆلینا زانستی یا هه‌ڤچه‌رخ.