ئەڤ ئەڤ ڤەکۆلینا نوکە ئارمانجا وێ ناسینا ئاستێ گوشارێن ژیانێ یە ل دەف قوتابیێن پشکێ دەرونناسیێ ل کۆلیژا زانستێن مرۆڤایەتی ل زانکۆیا دهۆکێ، هەروەسا ئاشکراکرنا پەیوەندیێ د ناڤبەرا گوشارێن ژیانێ و ئاراستەیێن بەرەڤ کۆچبەریێ ل دەف وان. ئەڤ ڤەکۆلینە ل سەر میتۆدێ وەسفی یێ پەیوەندیدار (المنهج الوصفي الارتباطي) هاتیە ئەنجامدان، ژبەر کو یێ گونجایە بۆ سرۆشتێ ئارمانجێن ڤەکۆلینێ.
کۆما نموونەیا ڤەکۆلینێ ژ ژمارەکا قوتابیێن پشکێ دەرونناسیێ پێکدهێت کو ب رێکا گونجای هاتینە هەلبژارتن. د ڤێ ڤەکۆلینێ دا پێوەریێ گوشارێن ژیانێ و پێوەریێ ئاراستەیێن بەرەڤ کۆچبەریێ بۆ کۆمکرنا داتایان هاتینە بکارهینان، پشتی کو پشتراستبوون ژ راستی و جێگیریا (صدق و ثبات) ئامیران هاتیە کرن.
ئەنجامێن ڤەکۆلینێ دیارکر کو ئاستەکێ بەرچاڤ یێ گوشارێن ژیانێ ل دەف قوتابیان هەیە، هەروەسا ئەنجامان نیشان دا کو پەیوەندیەکا خودان واتایا ئاماری (دلالة إحصائية) د ناڤبەرا گوشارێن ژیانێ و ئاراستەیێن بەرەڤ کۆچبەریێ دا هەیە؛ ب ڤی رەنگی کو هەرچەندە گوشارێن ژیانێ زێدە ببن، ئاراستەیێن ئەرێنی بەرەڤ کۆچبەریێ ل دەف قوتابیان زێدەتر دبن. ئەڤ ئەنجامە هندێ دگەهینن کو ئەو گوشارێن دەرونی، جڤاکی و ئابۆری یێن کو تووشی قوتابیان دبن، دبنە ئەگەرێ ب هێزکرنا حەزا وان بۆ هزرکرن د کۆچبەریێ دا پێخەمەت لێگەریان ل سەر بارودۆخەکێ باشتر یێ ژیانێ و دەرونی.
ل دویڤ ئەنجامان، ڤەکۆلینێ پێشنیار کر کو پێدڤیە گرنگی ب ساخلەمیا دەرونیا قوتابیان بهێتە دان، و بەرنامەیێن رێنمایی و دەرونی د ناڤ زانکۆیێ دا بهێنە دابینکرن، هەروەسا کار بهێتە کرن بۆ سڤککرنا وان گوشارێن کو تووشی قوتابیان دبن دا کو ببیتە ئەگەرێ ب هێزکرنا هەستا وان ب جێگیریێ و په‌یوه‌ستبوونێ ب جڤاکی ڤە